جامعة القدس - أبوديس

من أجمل الأمور في كليتي كلية علوم القران ، النخبة العملاقة من العلماء والمدرسين ، والمواد القوية ، والالتزام في الفصل بين الجنسين دون اختلاط ، واتمنى ان تلتزم الجامعة في قسم التسجيل القبول في المواعيد دون مماطلة وتاخير

للاسف الجامعة تراجعت عن انها جامعة عريقة صارت فقط لنهب المصاري يعني مش عارفة وين بروحو مصاري الطلاب بدل ما تحسن في الجامعة بتتراجع لورا الطلاب بكتروا والمقاعد بقلو والكافتيريات مش ولا بد حتى التخصصات مش كافية لازم يكون تخصصات ادبية اكتر حاصرينة بتخصصات تجارة وحقوق واكم تخصص ادبي

مقبولة نوعاً ما , الكادر التدريسي منيح باعطاء المعلومات بس الواحد ما بقدر يتناقش معهم ولا يحكي كلمة ، بتموت وانت بتسجل بالمواد وممكن تثبت برنامجك تلاقيه تاني يوم متغير بدون علمك ، بحاجة لكافتيريا وعدد شعب يستوعب عدد الطلاب خصوصاً في التدريب العملي

والله مش مبسوطة كثير يعني الجامعة كمنظر حلوه بس فيها كثير سلبيات مثلا ما في كافيتيريات والاكل مش زاكي، تعامل الدكاترة مش كل هالقد وفوق ما المواد صعبة بعقدوها بزيادة بطريقة شرحهم المقعدة، ما في مواصلات منيحة، التسجيل لازم تتمرمط عشان تزبط امورك، فش تعبير عن الرأي ولا إحترام للطالب.

مباني سيئة جدا ومواصلات صعبة و عمادة لا تهتم الا لمصلحتها

كطالبة في كلية الدعوة تجربتي في الجامعة كانت جميلة ٬ الطاقم التدريسي اكثر من رائع ومتفهم ولهم علينا من الفضل ما نسال الله لهم به ان يجعله في ميزان حسناتهم ٬و الطواقم الاداريه صدورهم رحبة خصوصا مع الطلاب الي ما عندهم علم بالانظمه والقوانين بساعدوهم وبرشدوهم لو الطالب تعامل معهم باحترام ٬ واما الامن فكثر محترمين ويما ساعدوني لما ضاع جوالي وضاعت شنتتي ٬الطريق والمواصلات صعبه وطقس ابوديس ما بساعد ولكن مش مهم كلو اباجر وثواب لو الواحد اخلص نيتو ابطلب العلم ٬ هلء الجوانب الي محتاجه تحسين في الجامعة انو الطالب بدخل ما عندو علم لا بالانظمه ولا القوانين ولا بكون عارف كيف يتصرف انا بقترح مساق اللغه والتفكير يتغير وينحط بدالو دورة تاهيله لطالب ويعلمو اشياء زي كيف يسجل يطلعوه على خطته وصف مساقاتهم مرافق الكليه ووظيفة كل منها الطلبات الي ممكن يقدمها في الشؤون الطلابية عند تعرضه لمشكله اماكن تواجد المحاضرات خريطة المباني ومعاني الزموز عليها كيفيه استخدام الاي كلاس وهيك اشياء مهمه ابتلزمه

كانت اكبر غلطة بحياتي 🙂

انا طالبة تجسير من الشمال وضعي متل وضع كثير من الطالبات في الجامعة الفصل هاد اخر فصل النا استعملو معنا كل طرق التذليل مافي شعب مفتوحة المواد اللي ضلتلنا مغلقة شعب محجوزة و هاد كلو غير عن التدريب العملي اللي نزل في اريحا وانا كبنت من نابلس بهاي الاوضاع و بشتغل بعيد كل البعد اني اروح على اريحا يومين بالاسبوع لحتى اتدرب مع العلم في شعبة في نابلس مفتوحة و فيها طلاب بتدربو بس انا اللي بعتني هناك و قام بتدخيل طالب من الخليل مكاني بالشعبة ولا يناسب مكان عملي من اول فصل الي ولا فصل مشا و عدا بدون ما ننذل الهم

من اهم الاشياء الي لازم تتغير 1- تحسين من مستوى مباني الجامعة من الداخل و الاهتمام في النظافة (الطالب بدفع 600 شيكل خدمات ما بشوف اشي منهم) 2- تعامل الدكاترة مع الطلاب، انا حملت مادتين بسبب عقلية الدكتور مش فاهم هو انا بمصحة عقلية ولا ايش مع العلم كنت من الاوائل على الدفعة 3- سعر الساعة لمتطلبات الجامعة، مش منطق انا ادفع 1100 على مادة الحضارات او غيرها و زميل بتخصص ثاني يدفع نص السعر مع انو احنا بنفس الشعبة يعني الي بستفيدو انا مش اكثر منو كلنا بنتعلم نفس المادة 4- زيادة النشاطات الطلابي و خصوصا دمج طلاب سنة أولى في المجتمع صحيح هاي مش شغلة الجامعة بس في طلاب بكون معهم مشاكل او ضعف شخصية، مثلا لما يكون عندو برزنتيشن مسكين قلبو بوقف، يا ريت لو نشتغل ع هاض الموضوع 5- واجب على الجامعة تشجيع الطلاب على فتح مشروع بالجامعة مش توقف ضدهم و ترفض الفكرة. كنت عامل ديزاين داخلي و خارجي لمبنى الحزماوي و تكفلت بكل المصاريف الي مترتبة علي من بناء الهيكل و اعادة تسوية الارض القائمة عليه و زرع الشجر لكن ما ان عرضت الفكرة على القائمين بالجامعة تفاجأت بالرفض السريع. طبعا كل جامعة عندها سلبيات و اجابيات

💐💐 بالتوفيق جامعتنا ، تجربه رائعه

جامعة فاضية مفش فيها غير هالزرّيعة وَي كأن اللي مسجلين فيها ----

القاعات كتير صغيرة ضغط والاضاءة مو مريحه وما في تكييف..الكافيتيريات اكلهم مو بزياده وقلال فش مقاعد ...لازم يتوفر كمان كافيتريا او تنتين مع اكل زاكي..وفش مكان لاقعد فيه بالبريك بقضيها جوا الكليه..النت كتير سيء وضعيف صار بدي مصروف زياده كل شهر لاشبك 3G ...ويريت كل طالب ياخد دوش سريع قبل ليجي لانو صار معي دوخه

حلوة بس مشكلة لكلاب كل مرة بكونوا اكتر خصوصي فترة الصبح عند كلية الدعوة هديك المرة شفت ٥ كلاب تعقدت دكاترة الشريعة ما بنلاقي احسن واحلا من معاملتهم واسلوبهم وبرضو في دكاترة من خارج كلية الشريعة كل الاحترام الهم ما في محارم بالحمام وقلة نظافة الحمامات والمي بكل مكان في الحمام المواصلات في اغلب المرات بينقطعوا وما بنوصل الدار الا والدنيا ليل

كُلية الثنائية هي التوب 👍🏽 وبتمنى انه يزيدوا عدد الكافيتيريا لانه شوي وبنصير نقعد عَ الارض وشكراً

ما في منح و ازا في منح ف هي مش لطلاب الطب مع انو يمكن أكتر ناس بحاجة بكونوا ، و مبلغ الإرشاد كبير ،ما في تسهيلات بالدفع .

اكثر اشي حبيتو الخضار الي فيها واجوائها والباقي سيء جدا

احببت بأنها جميلة المظهر،لكن انا اخذ في كلية العلوم ولا يوجد بها تبريد وايضا طاقم التدريس ليس بذلك الكلقم الجيد والاسعار مبالغ فيها جدا وايضا التسجيل مذل جدا مع اني ابن البلدة وحاصل على معدل ممتاز

والله مش مبسوط كثير

جميلة ممتازة

بتمنى انه يكون للطالب كلمة زيه زي المسؤولين بالجامعة لانه الكل داير ورا مصلحته ما في مساعدات ولا في اي دعم للطالب وخصوصاً الطب بس الي اله واسطة ووضعه منيح بوخد عينيهم والباقي بدخلو عالسحب

مش ولا بد

اكثر شي حبيته بالجامعة : أن طلابها اجتماعيين كثرة التبادل الطلابي

بتمنى تتغير أسعار بعض المساقات ويجعلوها بسعر موحد مثلاً المتطلبات الجامعية تكون ساعة التخصص عند احدا التخصصات ب 100$ وتخصص اخر ب 230$

الكفتيريات قليلة وامكانياتها محدودة ومحصورة في بؤرة واحدة ،، مباني الجامعة قديمة والقاعات بحاجة الى تعديلات واضافة مكيفات وخاصة في كلية العلوم التكاليف والرسوم والاقساط عالية جدا والمنح غير متوفرة ومعدومة خصوصا لكلية الطب

تخصص الطب البشري 6 سنوات، السنوات الثلاث الأولى في الجامعة مضغوطة جدا بسبب كثرة المتطلبات الجامعية. وثلاث سنوات في المستشفيات، جودة التدريب سيئة جدا، خاصة بسبب عدم توفر مستشفى جامعي، وانشغال الدكاترة. تكلفة التعليم عالية جدا مقارنة مع جودة التعليم والخدمات التي تقدمها الجامعة للطلاب. عدم توفر أندية فاعلة للبحث العلمي. سكنات طلاب المرحلة السريرية سيئة جدا، وتحتاج للمتابعة والكثير من الإصلاحات.

سيئة سيئة سيئة

عدد الكافتيريات غير مناسب جدا لعدد الطلبه , المواصلات سيئة جدا, لا يوجد ادنى مقومات النظافه في الحمامات ابدا, اغلب القاعات عدد الكراسي لا يكفي لعدد الطلبه , الكراسي غير مريحه بحاجة الى تجديد, يوجد تكييف ولا يوجد ريموت كنترول للتحكم به, سياسة الجامعه ممنهجه ومرتبه لصالح العاملين في الجامعه و للجامعه نفسها ولا يتوفر ادنى حقوق للطلبه

نظام الثنائية

الشيء الوحيد الجيد بالجامعة هو الشجر.

من ناحية الاشي لمنيح فيها هو ولا اشي اللي نفسي يتغير هو الجامعة بحالها